Sa Huni Sang Akon Lantoy by Flavio Zaragoza Cano
I.
Sa huni nga dì sampaton
sang bikwalon ko nga lantoy,
pamatìi ang panganduhoy,
sang akon tagiposòon:
masubù nga panalabiton
ang iya mga halimbawà;
subong sang tangis kag kaghà
sang Ilóy nga nalulutan,
sa atubangan sang lulubngan
sang anák nga pinalanggà….
II.
Kon magbanàag ang adlaw
sa masilì nga sidlangan,
sa sulud sang akon dughan
nagadapù ang kamingaw;
akon ginapanganinaw
ang dakù ko nga kasakit
sa mga gal-um sa langit
kag mga bulak sa dutà,
basì pa lamang mapalà
sa akon kabuhî ang dalit.
III.
Mapàit nga waláy angay
ang magsalìay sa kaghà
kon ang mahapdì nga luha
sa mga matá nagaagay;
ang akon mga panghayhay
nga nagahalin sa dughan,
daw huní sang kapispisan
sa katamnan nga matulin,
daw dupuydupuy sang hangin
sa sanga sang kakahuyan….
IV.
Busà dilî pag-isikway
ang gugma kong ginahalad
kay ikaw ang akon palad
ikaw ang akon kalipay;
ikaw ang dapat magsapnay
sang akon gugmang hamilì,
kag agúd dilî matunglì
ang bulak sang akon kalág
pasilaki sang kasanag
sang gugma mong labing putlì….
