Pasidungog Sa Baganihan
By Vivian Azucena-Topor
Finalist in the Komposo Writing and Live Performance Contest Komposo Festival, 27 May 2023, ILOMOCA
Salamat nga daku sa sining higayon
Akon ipabati kanta nga matahum
Pukawon ang inyo nga mga balatyagon
Gani magpamati, gani magpamati, sining akon lanton.
Sa sining dakbanwa, may isa ka tinuga
Maalam, ma-isog, may pagkabalaka
Sa aton nga tanan, Amay ang tawag ta
Kay siya halangdon, kay siya halangdon, aton sya kilala.
Paghalit sang COVID madamu problema
Pati mga tawo sa iban nga banwa
Mansig pinamangkot kon ano himuon ta
Ining aton Amay, ining aton Amay, sa plano nanguna.
Nanghatag pagka-on sang iya kusina
Nalipay ang tanan nagsalo sa lamesa
Pati pa ang bulong sadtong may resita
Iya ginpangitaan, iya ginpangitaan sa mga botika.
Sang kita na lockdown, sa sulod sang balay
Ang aton nga Amay wala gid sang pahuway
Pakadto pakari sa COVID nagbantay
Naghatag kalig-on, naghatag kalig-on, ining aton Amay.
Mayor Jerry Treñas ang tawag sa iya
Halangdon nga lider sang aton dakbanwa
Masami nga bukas ang iya opisina
Handa nga magbulig, handa nga magbulig, kon magpalapit kita.
May mga tini-on nga sya nagpangisog
Sa pagtililipon upod sang mga bantug
Sa iya kaakig nagtaas ang tingog
Indi sya malingkang, indi sya malingkang, sa husto nagatindog.
Ining mga bantug, mataas ang pwesto
Pero ang desisyon daw wala sa wisyo
Imbis nga mag-ayo, halit kag perwisyo
Si Mayor nag-ngurob, si Mayor nag-ngurob, gani andam kamo.
Ang iban sa aton, indi man sya gusto
Kita makabati puro lang reklamo
Paano gid bala, wala man perpekto
Si Mayor JPT, si Mayor JPT, tampad magserbisyo.
Programa ni Mayor, aton nga sakdagon
Para kaayuhan sang tanan maagum
Pisikal kag sosyal ini ang iya handum
Ang gusto ni Mayor, ang gusto ni Mayor, kita ang magyuhom.
Aton panumdumun, ang palaabuton
Sa bahin ni Mayor, iya tinguha-on
Bata kag tigulang, sila asikasuhon
Kay sya ang Mayor, kay sya ang Mayor, sang banwang halangdon.
Mga kasimanwa llonggo ko nga abyan
Kita ang mag-ugyon si Mayor pasidunggan
Salamat sa iya, kag panginbulahan
Halangdon nga Mayor, halangdon nga Mayor, aton baganihan!
To be sung in the tune of “Ako ang Namunit sa Pangpang sang Gugma” by Pirot)
